ӘЙЕЛІҢ ЖАҚСЫ БОЛСА...
Қаз дауысты Қазыбек пен Әлібек батыр ел аралап келе жатса, жол бойында бір қария жолығады. Сонда Әлібек батыр әлгі қариядан:
– Уа, ақсақал, ауыл берекесі қайтсе кетеді? – деп сұрайды.
Әлгі адам сәл ойланып:
– Ауыл ақсақалы шала болса, жігіттері алты ауызды ала болса, кішілері үлкеніне сен десе, міне, сол ауылдың берекесі кетеді, - дейді.
Қаз дауысты Қазыбек би тұрып:
– Уа, қария, ал үйдің берекесі ше? Үйдің берекесі қайтсе кетеді? – деп сұрайды.
Қария:
– Әйелің қабағын түйіп керілсе, шай құйып беруге ерінсе, ұлың ұрысқа сай болса, келінің керіске сай болса, қызың сумақай болса, сол үйдің берекесі кетеді, – деп жауап береді.
– Не жақсы?
Ақсақал мүдірмей:
– Атың жақсы болса, тіршілікте мінген пырағың. Балаң жақсы болса, жанып тұрған шырағың. Әйелің жақсы болса, досың жаныңа жиналып, риза болар қонағың, - дейді.
– Не жаман?
– Атың шабан болса, тіршілікте көрген азабың. Балаң жаман болса, ғұмырлық көрген азабың. Әйелің жаман болса, досың сенен безініп, үйіңнен кетер қонағың, – деген екен...
#асыларна #ОтбасыТыныштығы #береке #әйел
